Xanımların blog dünyası.

      

Sizi bilmirəm, amma mən yazmağı sevirəm. Bəziləri bunu oxuyub deyəcək gözlərimiz aydın. Yox, yazmaq eşqi oxumaq eşqindən irəli gəlir. Nəsə, bunu bir qırağa qoyaq. Niyə mən məhz ölkəmizin xanım bloggerləri haqqında yazmağı qərara aldım? Abunə olduğum bir kişi blogger var. Adı İbrahim Niftiyevdir. Keçən həftə onun blogunu ələk-fələk edib, maraqlı məqalə axtararkən, gözlərim təsadüfən, təzə yazılmış məqaləyə dəydi. Məqalənin adı "Əziz bloggerlər, dəyişməyin vaxtıdır" idi. Bu məqalə yerli istedadlı kişi bloggerlər haqqındaydı. Düzü mən özümü feminist saymıram. Amma nədənsə beynim sözün yaxşı mənasında "çöndü". Niyə xanım blogger haqqında blogumda məqalə olmasın ki? İnternetin, sosial şəbəkələrin, mikro və makro blogların bu qədər məşhur olduğu zamanda niyə də xanım bloggerlərimizi mənim oxuyucularım və ümumən sosial şəbəkədə məni izləyənlər tanımasın? Uzun sözün qısası, başladım xanım bloggerləri axtarmağa. Feysbukda status yazdım ki bəs kim xanım bloggerlər tanıyırsa, bloguna və feyskbuk profilinə, eləcə də elekton poçtuna keçid versin. Çox sağ olsunlar dostluğumda olan və olmayanlar əllərindən gələn yardımı etdilər. Düzü dostluğumda da blogger xanımlar var. Həmin xanımlarla bir-bir əlaqə saxlayıb, 3-5 standart suallarımı ünvanladım, onlar da öz növbəsində məni qırmadılar. Cavablandırıb, fotoları və bloglarına linklərlə mənə yolladılar. Budur, qarşınızda əlim çatan, ünüm yetən, ölkəmizin xanım bloggerləri. Əlbəttə yəqin ki bu xanımlardan da başqa xanım bloggerlərimiz olmamış olmaz. Lakin mən yanlız bu xanımlardan xəbər tutub, onların cavablarını olduğu kimi sizə çatdırıram. Yadımdan çıxmamışkən, artıq üç ilə yaxın tanıdığım, çox hörmətli İbrahim bəyin bloguna link buraxıram. İbrahim əsasən oxuduğu kitablar və baxdığı filmlərdən məqalələr yazır. Kişilərsiz bir günümüz olmasın. İbrahim bəyin bloguna keçid: İbrahim Niftiyev

Buyurun, xanım bloggerlərimizə ünvanladığı 3-5 standart suallara cavablar. Siz də onları tanıyın, onların bloglarını oxuyun və onları sevin. Çünki qadınların mənim fikrimcə möhtac olduğu dörd şey var: mərhəmət, sədaqət, sevgi və diqqət. P.S. Özümü lap filosof hiss elədim, fikir verməyin, dəliliyimdən irəli gəlir.

Adım Ayseldir.. namı diğer Tarlanqızı..) iyunun 22 sində anadan olmuşam və 22 yaşım olacaq. İki ildir eyni boyda fərqli kilolardayam. Şokolad və dondurmanı çox sevirəm. İnsanlarla tez qaynaşıram, çox danışanam, birdə çox zaman yuxusuzam.. Әylənmək, yeni insanlar tanımaq, ünsiyyət qurmaq məqsədilə yaşayıb gedirəm. Başladığım işləri çox zaman sıxıldığım üçün yarımçıq qoyuram. Dərslərə, əmirlərə, nifrət edirəm. Dərslərə nifrət etsəm də 1 il əvvəl Psixologiya ixtisasını bitirmişəm.. Demək olar ki, 2 ildən çoxdur fərqli bloqlarda və saytlarda paylaşımlar edirəm, müəyyən mövzu ilə bağlı fikirlərimi bölüşürəm. Və bunu sevərək edirəm. Bir işi sevməsən niyə edəsən ki? Elə deyilmi?.. Nəticədə məcbur edən yoxdu.. Zorla yazan varmı görəsən?. Yoxdur hər halda.. Varsa tez bir zamanda bu işləri buraxsın məncə.. Məsələn mən çox zövq alıram hər nə qədər çox zaman ayıramasam da.. Anlayacağınız blog yazmaq gözəldir.. Təbii ki, səbəbləri var.. - Hər insan başqalarıyla bir şeylər paylaşmaq istəyir. Gördüyü, oxuduğu, izlədiyi fərqli bir şeyi paylaşmaq xoşbəxtlik verir insana. :) Kimisi bunu fərqli yollarla edir. Amma mən blog yazaraq qarşılayıram bu ehtiyacımı. Blog ilə paylaşma ehtiyacımı qarşılayıram. Yaşam paylaşdıqca gözəldir. Blog paylaşmaqdır.
Bloguna keçid: Aysel Tarlanqizi

Həsənzadə Fidan (ləqəbim Cahangirli) 27 yanvar 1995. Subayam, BDU jurnalistika fakültəsində oxuyuram. İxtisasım jurnalistdir. Hobbim çeynənmiş olsa da, kitab oxumaqdır. Musiqi və filmlərdir daha çox ingilis dilində seriallara baxıram.blog yazmağa məni cəmiyyət vadar edir. Ətrafımdakı insanlar, onların düşüncələri, davranışları, müşahidələrim yazmağa vadar edir. Və olan hadisəyə və ya müşahidələrimə satirik yanaşmağı sevirəm.

Bloguna keçid: Fidan Cahangirli

Zümrüd Cavid 1991, 8 oktyabr, subay, bloq yazmağı bəziləri vətəndaş jurnalistikası adlandırır, bəzilerine görə gündəlikdi bu, çoxları bloqu kimlərəse sözünü çatdırmağın ən unikal vasitəsi hesab edirlər, nədənsə bloq yazanda heç kim heç nədən çəkinmir, mən sadəcə şəxsi yaradıcılığımı yeri gələndə cəmiyyətdəki ziddiyətleri işıqlandırmaq mənimlə eyni düşüncədə olan insanlarla paylaşmaq üçün istifadə edirəm, BDU jurnalistika, hal hazırda magistraturada oxuyuram, jurnalist, rəsm çəkmək, şeir yazmaqdır.

Bloguna keçid: Zumrud Cavid

Həsənova Nazlı. 18.12.1990. Subayam. Blog yazmaqla ürəyimdəki həm "boşaltmış" oluram həm də oxucuya müəyyən mesaj göndərirəm. Çünki hər kəslə eyni vaxta eyni şeyləri müzakirə etmək vaxt baxımından çox zaman ala bilər deyə bu formada insanlarla "söhbətləşməyi" üstün tututam. Ümumiyyətlə blogumu dünyamın bir hissəsi hesab edirəm. Çünki sətirlərimin çoxu sadəcə sözlərdən ibarət cümlələr deyil mənim hisslərimdi. Mövzular adətən cəmiyyətdəki qlobal problemlər,boşluqlar olur. Bəzən sadəcə özümü narahat ya da ürəyimi incidən hadisələr olur. Hərdən bir şəkildən təsirlənə bilərəm ya da musiqidən. O halda mütləq həmin an məni narahat edən mövzunu qələmə alıram. Blogumda hər çür movzuya rast gələ bilərsiz. Fahişələrdən tutmuş homosseksuallara qədər, tənhalıqdan tutmuş xoşbəxt,hüzurlu həyata qədər hər məqama toxunmuşam çünki insanların taleyi eyni deyil istəyirəm hər kəs özünü tapa bilsin və "Nazlı ürəyimdəkiləri yazıb" deyə bilsin. 2009cu ildə Maliyyə İqtisad kollecinin Bank işi fakultəsini bitirmişəm hal-hazırda Amerikada İncəsənət universitetinin tələbəsi olmağa hazırlaşıram bu payız. İxtisasım İqtisadçı olsa da ən son satış üzrə Marketing Manager işləmişəm. Hobbilərim çoxdu. Həvəskar modelyer dizaynerəm. Dünyada az rast gəlinən bir şeyi edirəm:Ziyafət geyimləri toxuyuram,kitab oxumaq hobbilərimə daxildi. Sənədli filmlər izləyirəm yuxular barədə,dünyanın sonu,İnsan taleləri,möcüzələr,özünü inkişaf filmləri,uğur qazanmış insanların qeyri-adi vərdişləri və s.bunlarla maraqlanıram. Rap ən böyük hobbimdi bir də səyahət etmək. Raper qadın olaraq blog yazmaq məndə uğur alınır deyə düşünürəm.

Bloguna keçid: Nazli Shahzade

Məsumə Əhədova. 1991-ci il. Subay. Bern Universiteti, Hüquqşünaslıq. Özümü xatırladığımdan bəri yazıçı olmaq istəmişəm. Blog yazmağa başlamaq da bu istiqamətdə atılmış addım idi. 2012-ci ildə başladım. Aradan keçən dörd ildə blog mənim öz kiçik oxucu kütləmi tapmağıma kömək oldu. Blogu sırf ədəbi işlərimə ayırmışam, orada öz şeir və hekayələrimi paylaşıram. Yaxın gələcəkdə kitab çıxarmağı düşünürəm.

Bloguna keçid: Masuma Ahmadova










Günel Fərhad qızı Emin. 28 iyul 1983-cü ildə Bakı şəhərində anadan olmuşam, ailəli olub, ayrılmışam, 5 yaşında bir qızım var, 2000-ci ildə 132 saylı orta məktəbi, 2006-cı ildə Azərbaycan Dövlət İqtisad Universitetinin maliyyə-kredit ixtisası üzrə magistr dərəcəsini almışam. İxtisasca maliyyəçi, iqtisadçıyam, risk, sərmayə, maliyyə inzibatçılığı, beynəlxalq maliyyə münasibətləri, maliyyə cinayətkarlığı ilə mübarizə sahəsində çalışıram.Yazmaq, toxumaq, kitab oxumaq, piyada gəzmək, açıqca yığmaq, sevdiyim musiqi janrları üzrə rəqs etmək kimi hobbilərim var. Səyahət etməyi, sağlam qidalanmağı və idmanı çox sevirəm. Uşaq yaşlarımdan yazıram, ictimaiyyətə yazılarımı 2002-ci ildə təqdim etmişəm, Paritet və Palitra qəzetlərində dərc edilməklə (rəhbərliyinə öz minnətdarlığımı bildirirəm). Sonra azersayt.com ilk milli bloq saytında yazılarımı yerləşdirmək ehtiyacı və zəruriyyətini hiss etdim, sayt 2012-ci ildə birdən-birə dayandı. 2012-ci ildə Paritet qəzeti də fəaliyyətini dayandırdı. Mən də yaradıcılığıma ara verdim, ancaq sosial şəbəkədəki səhifəmdə paylaşırdım. 2015-ci ilin mart ayında yazılarımı olke.az saytı dərc etdirməyə başladı, buradan saytın rəhbəri Məmməd Gülməmmədova öz dərin minnətdarlığımı bildirirəm. Daha sonra todaysbaku.az (Vüqar Quliyev) və aktual.az (Anar Yusifoğlu) saytlarında dərc edilməyə başladım. 2015-ci ilin aprel ayının sonu idi, rəfiqəm Ruhanə Paşazadə yaradıcılığımla tanış idi, məsləhət bildi ki, bir bloq saytından qeydiyyatdan keçim, həm müəlliflik hüququna görə, həm də yazılarım ilk orada çap edilər, öz bloq saytım olar. Bloqqer kimi əslində 2008-2012-ci illərdə unudulmaz.azersayt.com saytım ilə fəaliyyətdə olmuşdum. Yenidən qayıdışım sadəcə wordpress.com saytında oldu, buradakı bloq səhifəm mənə daha çox uğur gətirdi, media yazılarımı birbaşa oradakı səhifəmdən götürür. İstinad hüququm tam qorunmasa da, müəlliflik hüququnun qorunmasına ciddi nəzarət edirəm. Hər mövzuda yazıram, sosial, aktual mövzularda, tənqidi, satirik, yumoristik, realistik, təhlili, araşdırma yazılarım da az deyildir. Yaradıcılığımı geniş oxucu auditoriyasına, yazılarımda olan ismarıcları cəmiyyətin üzvlərinə çatdırmaqdır istəyim. Bir də sevdiyim məşğuliyyət insanları müşahidə etmək, baxdığım filmə və oxuduğum kitaba dair fikirlərimi yazmaq, çox zaman tənqidi rəylər yazmaq.

Bloglarına keçid: Gunel Emin Gunel Emin

Samirə Hüseynzadə, lakin blog adı və işlərimdə istifadə elədiyim ad Samsam Hüseynzadə. Mənası kəskin deməkdir bu arada. 2002ci il 4may doğum tarixliyəm. Blog yazmağa keçən il başladım. Adətən yazırdım amma heç kim oxumayacaq deyə yayımlamırdım heç harda. Sonra təsadüfən bir saytda yazmağa başladım. Ümumiyyətlə əvvəldəndə bloggerlərə qarşı simpatiyam olub, əsasda video bloggerlər. Hətta blogger olaraq ilk layihəmin adı "Xoşbəxtlik Axtarışında" dır. Dayandırmışam indi. Mövzu fərq eləmir əslində, görürəm, anlayıram və anladığımı özümdə formalaşdırıb yazmağa çalışıram, amma blogda oxuduğum kitablar, izlədiyim filmlər haqda da yazmağa çalışıram, çox yazı var əslində yerləşdirmədiyim. Hələ oxuyuram normal olaraq. Gələcəkdə memar olmaq kimi bir istəyim var. Hobbi adətən oxumaq, izləmək və dinləməkdir.
Bloguna keçid: Samira Huseynzade




Günel Nağıyeva Yusif qızı. 30.01.1992-ci ildə anadan olmuşam,subayam. Bloq yazmağa DVV
international qht gürcüstanda hər 3 cənubi qafqaz ölkəsindən seçilmiş gənclərin qatıldığı proqram çərçivəsində yazmağa başladım. Əsasən mövzularım konkret istiqamətdə olmur, yəni ürəyim nə istədisə, çalışıram bütün qafqazı əhatə edən mövzular olsun və ya sırf sosial Azərbaycana aid. Çox fəal deyiləm, yəni belə bir qanunum yoxdur ki ayda 10 dənə bloq yazmalıyam. İstədiyim zaman yaziram, necə deyərlər bədahətən, təb gələndə) özüm maliyyəçiyəm, İqtisad universitetini həm bakalvr, həm magistr üzrə bitirmişən, ixtisasımı da çox sevirəm. hobbilərim arasında illərdi nə? harada?nə zaman? intellektual oyunları oynuyuram, breyn rinq tv versiyada kapitan olmuşam və futbola baxmağı çox sevirəm, ən çox rahatlaya bilər məni futbol baxmaq) bir də yaman melomanam) Blogum  kifayət qədər oxunur deyim, yəni çox yazmadığımı nəzərə alsaq, müxtəlif ölkələrdən və bir neçə min dəfə artıq oxunub. Heç yerdə PR aparmıram. Sırf öz fb səhifəmdə share edərəm uzağı, burda da 140 dostum var) yəni, kütlə yığmıram məqsədyönlü şəkildə.

Bloguna keçid: Gunel Nagiyeva

Fatimə Hüseynzadə, 22 yaşım var, subayam. Həmişə içimdəkiləri yazılara tökməyi istəmişəm, sadəcə başlamaqçün nəyəsə ehtiyac duyurdum. Nəhayətində hind filmləri haqqında eşitdiklərim məni vadar etdi ki, başlayım. Əvvəl düşünürdüm sadəcə hind filmləri haqda olacaq, amma hiss etdim ki, başqa şeylərdən də yazmalıyam. Çox uzağa getməyək, elə bu gün Axır çərşənbə falları haqda yeni post yazdım.Yaxın zamanlarda məşhur filmlər, kitablar haqda da yazılar olacaq. İxtisasca isə mühəndisəm, ADNA məzunuyam.

Bloguna keçid: Fatime Huzeynzade

Abduraxmanova Günel. 02 noyabr 1990-cı ildə Sumqayıt şəhərində dünyaya gəlmişəm. Təhsilimi  Bakı şəhərində almışam. Azərbaycan Dövlət Pedaqoji Universitetinin Coğrafiya ixtisası üzrə bakalavr, magistr səviyyəsini bitirmişəm. Hal-hazırda həmin Universitetin Coğrafiya üzrə fəlsəfə doktorluğunda təhsil alıram. Ailəli deyiləm. Çox geniş maraqları olan bir insan deyiləm. Mütailəni, fotoqrafiyanı (həvəskar) və yazmağı çox sevirəm. Təbii ki, yazmağa olan maraq və sevgi isə tamam başqadır. İlk blog səhifəmi 2013-cü ildə yaratmışam. Yazdıqlarım sadəcə bədii üslubda idi. O vaxtlar davamlı surətdə yazmağı düşünmürdüm. Buna yazdığım yazıları bir yerə yığma həvəsi də demək olardı. Lakin sonradan yazı sayı artdıqca və daha yeni ideyalar yarandıqca düşündüm artıq blog səhifəmi daha fərqli tərzə salmağın vaxtı gəlib çatıb. Özümə mən bloggerəm deyə bilmirəm. Olsaydım belə hər halda deyə bilməzdim :) Sadəcə blog səhifəmdə xüsusi bir konsept üzərindən deyil, daha çox hiss etdiklərim, düşündüklərim və baş verən hadisələr barədə yazmağı sevirəm. Siz buna "gündəlik" də deyə bilərsiniz. Hal-hazırda fəaliyyət göstərdiyim sahədə adətən konsept məqalələri yazdığım üçün deyəsən şəxsi blogumda artıq bu tip yazılara ilham qalmır və mən sadəcə özümü ifadə etməklə kifayətlənirəm :) Ümumiyyətlə yazmağa məni sadəcə hisslər vadar edir. Bu istər bədii, istər elmi yazı olsun, fərq etmir. Buna özünü məcbur etmək mümkün deyil. O sadəcə gəlir və yazırsan. Bu məndə nə dərəcə uğurlu alınır ya alınmır bilmirəm. Sadəcə ümid edirəm ki, hardasa kimsə mənim yazdığım fikirlərlə razılaşır və yazdıqlarımı özündə hiss edə bilir.

Bloguna keçid: Gunel Abduraxman

Aysel Abdullazadə. 06.05.1990. Subayam. Blog yazmağın xüsusi bir özəlliyi yoxdur, fikirlərini ictimailəşdirmək, topluma sunmaq üçün bloq sistemində işləmək əlverişlidir. Bir yazar kimi qələmimin əsas mövzusu toplumda qadın problemləri, yaşadığımız bu cəmiyyətdə XXI əsr olmağına baxmayaraq, hələ də qadın-qız olmağın çətinlikləri və ayrıseçkiliyi qarşısında dayanıqlılıq göstərmək, tabuları məhv etmək üçün qələmimə sarılıb, səsimi onunla insanlara çatdırmaqda bloq mənə ən yaxşı vasitədir. 2011-ci ildə Bakı Qızlar Universitetini bitirmişəm, ixtisasım filoloqdur. Hobbilərim müxtəlifdir. Səhərlər sübh tezdən dəniz kənarında dolaşmağı sevirəm, musiqi və dəniz vazkeçilməzimdir. Bir də yazmağı... Yazmadan yaşaya bilmərəm. Bu hobbidən çox, mənim üçün artıq yaşam tərzinə çevrilib, yemək, su ehtiyacı kimi həyatımda yer alıb. 

Bloguna keçid: Aysel Abdullazade 

Нателла Османлы, разведена, один сын, Западный Университет. Писатель, журналист, пиар и смм-консультант. Блог не тематический, а вокруг личности автора. В нем зарисовки, заметки. Блог входит в травел-проект #pureImpression

P.S. Nəzərə alsaq ki, Natella Osmanlı rusdillidir və blogunu rusca aparır, mən bu səbəbdən onun cavablarını tərcümə etdim.

Natella Osmanlı, boşanıb, bir oğlu var. Qərb Universitetinin məzunudur Yazıçı, jurnalist, piar və smm-məsləhətçisidir. Blogum mövzulara dair yox, öz müəllifliyim ətrafındadır. Blogumda eskizlər və qeydlər var. Blogum #pureImpression səyahət-layihəsinə daxildir.

Bloguna keçid: Nata Osmanli

Vəsilə Alməmmədovadır. Amma məqalələrimi Vəsilə Abbas imzası ilə yazıram.12.01.1988-ci ildə doğulmuşam. 6 aydır ki ailəliyəm və hələ ki övladım yoxdur. Blogu 2010-cu ildən yazıram. Əvvəllər bir dəftərçəm var idi. Ora yazırdım qeydlərimi. şəkillərlə bəzəyirdim. Sonra blogdan xəbərdar oldum və yazılarımı daha rahat ora yazmağa başladım. Uşaqlıqdan inşalar yazmağı sevirdim. Yaşım artdıqca hadisələrin mənə daha başqa cür təsir etdiyini və onları içimdə və fikrimdə saxlaya bilmədiyimi hiss edirdim. İstər istəməz yazırdım. Əlbəttə ki insanın yaşı artıqda və dünya görüşü genişləndikcə, oxuduğu kitbların sayı çoxaldıqca və tərzi dəyişdikcə bu yazılara da öz təsirini göstərir. Çox movzularda yazıram. Bəzən bir musiqi bütün keçmiş xatirələrimi oyadır və məni yazmağa vadar edir. Bəzən sərbəst şeirlər yazıram. hərdən mətnaltı yazıram. olur ki məişət və gündəlik hadisələri qeyd edirəm. Məni incidən mövzulara toxunuram. Oxuduğum kitablar haqqında yazıram. Bəzən də psixoloji mövzularda olur yazılar. Getdiyim ölkələr haqqında qeydlər edirəm. Qısası ürəyim istədiyi hər mövzuda yazıram. 2009-cu ildə Azərbaycan İctimai Siyasi uiversiteti bitirmişəm. Beynəlxaq əlaqələr fakultəsini. Hal-hazırda həmin universitet fəaliyyətini dayandırıb. ona görə də istəyirsizsə heç bunu qeyd eləmiyin. 7 ildir ki dövlət idarəsində şöbə müdirinin müavini vəzifəsində çalışıram. Ən böyük xobbim kitablarla bağlıdır. Kitab oxumağı da, almağı da çox sevirəm. Şəxsi kitabxanam var və onu onu daha da genişlətməyə çalışıram. Rəsm çəkməyi və əl işləri düzəltməyi də sevirəm.

Bloguna keçid: Vesile Abbas

Lamiyə Göycəyeva, 16.06.1986, evli, uşaq yoxdur, təəssüratlarımı unutmaq istəmirdim, mövzular: kitab, kino, yemək reseptləri, uşaqlıq xatirələri, tərcümə etdiyim hekayələr. Bitirdiyim universitet: AzTU-Azərbaycan Texniki Universiteti, ixtisas: telekommunikasiya mühəndisi, hobbilər: toxuma, tikmə, tərcümədir.

Bloguna keçid: Lamiye Goyceyeva

Sevinc Məmmədova. 16.08.1984. Subayam. Blog yazmağa məni ilham pərim vadar edir, gələndə yazıram, gəlməyəndə susuram. Əsasən kitablar, ədəbiyyat haqqında yazıram. BDU, Tətbiqi Riyaziyyat və Kibernetika fakultəsini bitirmişəm, ixtisasca IT mühəndisiyəm. Hobbilərim: tikmələr, əl-işləri, anti-stress boyamalar, şəkərbura bəzəmək və s.

Bloguna keçid: Sevinc Memmedova
  Смайлик «smile»

Amanova Gültac, 10 noyabr 1995 ci il. Subayam. Bakı Dövlət Universitetində III kurs Sosial İş ixtisası üzrə təhsil alıram. Blog yazmağa məni vadar edən səbəb ilk vaxtlarda oxuduğum kitabların sujet xəttinin, qəhrəmanlarının adlarının yadımdan çıxması və ən əsasıda kitabı oxuduqdan sonra müzakirə edə biləcəyim çox insan olmamasına görə hərşeyi unutmağım oldu. Oxuduğum kitablar haqqında yazıram daha çox. Oxuyub bitirdikdən sonra nə hiss edirəm, necə kitab idi, xarakterlər necə idi deyə yazıram. Eyni zamanda izlədiyim filmləri, dinlədiyim musiqiləri bölüşürəm (ki bunu daha çox özüm üçün yazıram, düşünürəm ki 3-5 il sonra geriyə dönüb izlədiyim film, dinlədiyim musiqi zövqümü xatırlaya bilərəm bununla). Bunlarla yanaşı “sosial iş” ilə və onun əhatə etdiyi mövzularla bağlı insanları maarifləndirməyə, mahiyyətini çatdırmağa çalışıram. Blog yazmağa dediyim kimi, daha çox gündəlik kimi, bəzi şeyləri unutmayım deyə xatırlamaq üçün yazırdım, və ilk başlarda ən maraqlı hobbi olmuşdu mənim üçün. Sonradan izləyicilərimin sayı dəhşətli dərəcədə artmasa da 50-60 nəfər belə olsa,hətta daimi 1 izləyicin olsa belə, daha çox məsuliyyətlə bu işə yanaşmam gərəkdiyini gördüm. Son 2-3 ayda hobbi olaraq demək olar mı bilmirəm, ama yazmağı çox sevirəm. Yazmaq deyəndə hekayələr, şeirlər yox əsasən keçirdiyim anımı, hisslərimi. Bununla bağlı yüzlərlə yazı yazmışam, ama sadəcə özümdə saxlamağa üstünlük verirəm, çünki yazdıqdan sonra bütün ağlımda dolanan fikirlərin durulduğunu və günümü daha rahat keçirdiyimi düşünürəm. Oxuduğum kitabların şəkillərini çəkməyi, toxumağı, pianoda ifa etməyi, velosiped sürməyi sevirəm. Məni gündəlik–sıradan rutinləşmiş həyatdan çıxarda biləcək hərşeyi sevirəm. O andakı yorğunluğumu şahmatın götürəcəyini hiss edirəmsə şahmat oynayıram, o gün sabah gözəl oyandımsa dostlarımla dəlicəsinə əylənə bilirəm. Yəni, dəqiq bir hobbim var deyə bilməmişəm heçvaxt, hərşeylə məşğul ola bilərəm. Ən əsası odur ki, həyatı çox sevirəm, hər nə yaşanılırsa yaşansın yaşadığım hər anın dəyərini bilirəm. Həyat dolu insanları, pozitiv düşünən, azad qərar qəbul edə bilən insanları ətrafımda toplamağı və həmişə özümdə elə olmağı sevirəm. İnam və həyat sevgisi sayəsində hərşeyi bacara bilərəm. Blogumunda daha böyük kütlələrə təsir edib, kitab sevgisi aşılaya biləcəyi günləri görmək istəyirəm. Ən az 5-6 nəfər blogumda gördüyü kitabı oxuyub, eyni düşüncələri paylaşdığımızı deyəndə çox sevinirəm, bu insanların sayının artmasını və evlərin kitablarla dolub-daşdığı, insanların ön yarğılarının qalxdığı, hərkəsin üzündən gülüş əskik olmadığı günlər görmək istəyirəm bir gənc olaraq. Bu sahədə də üzərimə nə düşürsə həmişə etməyə hazıram, və bacardığım qədərilə edirəm.

Bloguna keçid: Gultac Amanova

Amanova Aytac. 1997ci ildə anadan olmuşam. Subayam.Hal hazırda Azərbaycan Tibb Universiteti Müalicə işi 1ci kurs tələbəsiyəm. Blog yazmağım daha çox digər yaxşı blogları gördükcə onları digər insanlara tanıtmaq istəməmlə başladı. Blogumda digər bloglar haqqında fikirlərimi yazmağı düşünürəm. Blogların dizaynı,yazılarını digər bloggerlər və blog izləyiciləri ilə də müzakirə edilir. Azərbaycanlı bloggerləri kəşf etmək və tanıtmaq əsas məqsədimdi. Bundan başqa,bədii kitab və filmləri sevirəm vaxt tapdıqca)

Bloguna keçid: Aytac Amanova

Qurbanova Aytən. 8 mart 1994-cü ildə Gəncə şəhərində anadan olmuşam. Azərbaycan Dillər Universtitetinin "İngilis dili müəllimliyi" ixtisasının 4-cü kurs tələbəsiyəm. Yaxın insanlar mənə "Aytoş" və "Qurbanova" deyə çağırırlar. Gənclik illərimdən maksimum istifadə edib boş durmamaya çalışıram. Məqsədim zamanımı səmərəli keçirməkdir. Bakıya gəlişimin ilk günlərindən köhnə "İrəli" İB-dən başlayaraq ondan belə Respublikada təşkil olunan demək olar ki, bütün layihələrdə könüllü kimi fəaliyyət göstərirəm. Xobbim maraqlı məlumatlar axtarıb insanlara çatdırmaq və türk dilində romantik kitablar oxumaqdır. Uşaqlıqdan mənə "Qənirə Paşayeva" deyirlər. Hələ bir çoxları isə "jurnalist" deyir. Açığı sevmirəm mənə jurnalist deyəndə. Bəlkə də cəmiyyətimizdə onlara qarşı mənfi münasibət, qeyri-ciddi qəbul olunmamaları məndə də onlar haqqında ziddiyyətli fikirlər yaradıb. Azərbaycanıma olan sevgimin əsası gördüyüm hadisələri insanlara çatdırıb onların gözünün açılmasına və inkişafında nələrsə etməyə çalışmaqdır. Haqqımın tapdalanmağımı sevməyən biriyəm. Ən əsasda, sözümü deməyi bacarıram. Hətta bir çox yerlərdə öz sözüm olmasa belə cəmiyyətimin problemini bildirib narazılıq edirəm. Belə hərəkətlərimə bəzən anam "Bəsdir!", "Sənə qalıb camaatın problemi?!", "Ay qız, sən axırda məni öldürəcəksən", "Bakı səni pis öyrədib" ,"Sən mənim canım, yazma" sözlərini deyir. Və bloq yazmağımı eşidəndə yaxınlarımın məni "top atəşi"nə tutacaqlarını düşünürəm. Amma məni anlayanların dəstək olacağına inanıram. Azərbaycanımda olan hər bir problem mənim cəmiyyətimin problemidir, cəmiyyətimin problemi isə Qurbanovanın problemidir.
Bloguna keçid: Ayten Qurbanova

Shade Nagizade (təxəlüsümdür) ad soyad olaraq son zamanlar elə bu cürə tanınıram. 1993-cü ilin 15 aprel buraxlışlıyam.Evim var amma subayam, blog yazmağa 2010-cu ildə başlamışdım. Sadəcə uşaqlıqdan yazı yazmağa həvəsli olduğum üçün bu işi bir hobbi kimi görməyə başladım və bir sıra məqalələr paylaşdım. Blogdan daha çox facebook vasitəsiylə yazdıqlarımı paylaşırdım. Daha sonra qərar verdim ki, yenidən bloggerlik fəaliyyətimə davam etməliyəm və iki ay öncə radioyazar adı ilə yenidən geri qayıtdım. Mövzular müxtəlifdir. Daha çox öz əsərlərimi (şeir, roman, köşə yazıları) paylaşdığım halda bəzən insanlara maraqlı olan məlumatları da araşdırmaqda zövq alıram... Əfsuslar olsun ki, valideynlərimin təkidi ilə Quba Dövlət Sosial İqdisad Kollecinin "İngilis dili" fakultəsini bitirmişəm. Özüm haqqında danışmaq ağırdır, ümid edirəm ki, yazdıqlarım sizi sıxmadı. Pessimistliyimi xoş qarşılayın, daha yaxşısını bacarmıram. Bir də hobbimi deməyi unutdum. Tanımadığım insanların playlistlərində saatlarla vaxt keçirirəm, ancaq heç vaxt şəkillərinə baxmıram. Onların nə etdiklərini, hansı evdə yaşadıqlarını, necə bir ruha sahib olduqlarını dinlədiyi ifalardan təyin etməyə çalışıram.

Bloguna keçid: Shade Nagizade








Mən Çeşmə Əli. 1991-ci ilin yanvarın 26 Şabran rayonunda anadan olmuşam.Orta təhsilliyəm, ailəliyəm, övladım yoxdur. "Həyatın rəngləri"- adlı bloq səhifəmi 2015-ci ildə yaratmışam. Düzünü desəm, yazmaqla aram yoxdu, əsasən çəkdiyim şəkilləri və o şəkillərə aid məlumatları qeyd etmişəm. Əsas mövzular "Doğma yurdun seyrində" Azərbaycanın bölgələrindən olan şəkillərim yer alır. İmkan daxilində rayonlara gedib, şəkillər çəkirəm. "Tarixin izləri" - Tarixi abidələr. Uşağları çox sevirəm, elə onlar da məni sevirlər. "Məsum təbəssümlər " adlı mövzuda çəkdiyim uşaq şəkilləri yer alır. Oxuduğum kitablar haqqında məlumatlar paylaşıram və s. Hobbilərim - sevdiyim işlərlə məşqul oluram, o an ürəyimdən nə keçsə həyata keçirməyə çalışıram. Əl işlərim olur. Güllərə qulluq etməyi, torpağla məşğul olmağı çox sevirəm. Kitab oxumağı, oxuduğum kitab haqında müəlifi və s araşdırıb, əlavə məlumatlar öyrənirəm. Şəkil çəkməyi çox sevirəm.

Bloguna keçid: Ceshme Eli

Son iki xanım blogger özlərinə məlum olan səbəblərdən

fotolarının yayımlanmasını istəmədilər. Hörmətlə...

Adım Sevinc Ağayeva. 1976-cı ildə doğulmuşam. Ailəliyəm, üç övladım var. Müəlliməm. Bloq yazmağa bir il öncə başlamışam. Niyyətim fayda verməkdir. Bloqda müxtəlif bölmələr var: mətbəx, sağlamlıq, tariximiz və s. Arayıb-araşdırıram, maraqlı, faydalı nə var dərc edirəm. Amma heç bir milli saytlardan, bloqdan copy etmirəm. Xarici saytlardan tərcüməylə kifayətlənirəm. Bir də "Yazılarım" bölümü var ki, buradakı yazılar ancaq özümə aiddir. Çünki hərdən qələmim dinc durmur, nələrisə cızma-qara edirəm. Hobbim şeir, kiçik hekayələr yazmaqdır. 

Bloguna keçid: Sevinc Agayeva

Səbinə Muradova. 1993-cü ildə anadan olmuşam. Azərbaycan Universiteti jurnalistika fakültəsini fərqlənmə ilə bitirmişəm. Blogum 2012-ci ildən açmışam ilk öncə dərs məqsədli olsada sonradan yazmağa davam etdim. Hobbilərim make up , nailartdır. Blogumda makiyaj, dəb , gözəllik qısacası qadınları maraqlandıran hər mövzuda yazılar təqdim edirəm. Gələcəkdə youtube kanalı açmağı düşünürəm.

Bloguna keçid: Sebine Muradova